Кандыдат ад Рэспубліканскай партыі Дональд Трамп перамог на прэзідэнцкіх выбарах у ЗША. Пра гэта паведамляюць агенцтва Associated Press, тэлеканалы CNN, Fox News і газета The New York Times. Раней палітык заявіў пра сваю перамогу, а шэраг лідараў сусветных дзяржаваў адправіў яму віншаванні.
Станам на 13.40 паводле мінскага часу, Трамп атрымлівае 277 галасоў выбаршчыкаў пры 270, неабходных для перамогі. У Камалы Харыс — 224 галасы выбаршчыкаў. Такія звесткі прыводзяць Associated Press і The New York Times.
Трамп, выступаючы перад сваімі прыхільнікамі, ужо заявіў, што гэтыя выбары — «цудоўная перамога амерыканскага народа».
— Гэта дазволіць нам зрабіць Амерыку зноў вялікай, — заявіў Трамп.
Паводле яго, для Амерыкі «наступіць залаты век», піша Руская служба Бі-бі-сі.
Падчас выступу Дональд Трамп таксама адзначыў унёсак у ягоную выбарчую кампанію мільярдэра Ілана Маска.
— У нас ёсць новая зорка, зорка нарадзілася. Гэта адзін з найважнейшых людзей для краіны, — заявіў Трамп
З перамогай на выбарах Дональда Трампа ўжо павіншавалі прэм’ер-міністр Ізраіля Біньямін Нетаньяху, прэзідэнт Украіны Уладзімір Зяленскі, французскі лідар Эманюэль Макрон, генеральны сакратар NATO Марк Рутэ, прэм’ер-міністр Венгрыі Віктар Орбан, канцлер Аўстрыі Карл Нехамер, прэзідэнт Сербіі Аляксандр Вучыч і іншыя сусветныя лідары.
Чытайце таксама
