Офіс генеральнага пракурора Украіны паведаміў пра дасудовае расследаванне магчымага расстрэлу расійскімі вайскоўцамі шасці ўзятых у палон украінскіх вайскоўцаў. Падставай для гэтага стала відэа, якое з’явілася ў сеціве.
Як адзначылі ў Генпракуратуры Украіны, паводле папярэдніх звестак, вайскоўцы УСУ былі ўзятыя ў палон у выніку штурму ўкраінскіх пазіцый у Данецкай вобласці.
«Расстрэл ваеннапалонных — сур’ёзнае парушэнне Жэнеўскай канвенцыі пра абыходжанне з ваеннапалоннымі і класіфікуецца як цяжкае міжнароднае злачынства. Праводзяцца следчыя дзеянні, скіраваныя на высвятленне ўсіх абставінаў злачынства і асобаў, якія маюць дачыненне да яго здзяйснення», — гаворыцца ў паведамленні ведамства.
Відэа расстрэлу ўкраінскіх ваеннапалонных з’явілася ў сеціве напярэдадні (мы не даём спасылкі на відэа з меркаванняў гуманнасці). Як лічыцца, яго здымалі самі расіяне. На ім захаваны расстрэл прынамсі шасці бяззбройных палонных — ім спачатку страляюць у спіну, а потым дабіваюць з аўтаматаў.
Пры гэтым гучаць рэплікі «Сюда, на х*й, сюда, по одному», «По одному! Сюда бегом!», «Один мой», «Снимай меня на камеру, бл*дь!», «Старый, это мой». Забойствы суправаджаюцца смехам.
Відэа абрываецца, калі на зямлі застаецца ляжаць сёмы ваеннапалонны, яго лёс невядомы.
Упаўнаважаны Вярхоўнай рады па правах чалавека Дзмітрый Лубінец заявіў, што «чарговым разам» звярнуўся ў ААН і Міжнародны Камітэт Чырвонага Крыжа з нагоды таго, што адбылося.
На падставе звестак з адкрытых крыніц, за 2024 год расіяне, як мяркуецца, забілі не менш за 92 украінскіх ваеннапалонных, падлічыла выданне «Вот так». Падчас самага масавага забойства ў пачатку кастрычніка на Пакроўскім кірунку былі расстраляныя адразу 16 палонных.
У 2025 годзе гэта першае апублікаванае ў сацсетках відэа расстрэлу ўкраінскіх ваеннапалонных.