Праведзенае ва Украіне апытанне паказала, што да Беларусі негатыўна ставіцца больш за 80% украінцаў. Столькі ж лічыць Беларусь краінай вайны, якая выступае супраць Украіны. Але яшчэ горш украінцы ставяцца да Аляксандра Лукашэнкі. Пра гэта гаворыцца ў чарговым даследаванні цэнтра Разумкова.
Пераважная большасць рэспандэнтаў (80,6%) лічыць, што Беларусь — краіна вайны, якая выступае супраць Украіны. Супрацьлеглага меркавання прытрымліваюцца 7,5% апытаных.
У цэлым украінскае грамадства дэманструе негатыўнае стаўленне да Беларусі. Больш за 80% рэспандэнтаў ставіцца да Беларусі адмоўна (56,3% — адмоўна, 24,4% — пераважна адмоўна). Станоўчае стаўленне да Беларусі выказалі 12,4% апытаных (3,1% — цалкам станоўчае, 9,3% — пераважна станоўчае).
Яшчэ негатыўней грамадзяне Украіны ставяцца да Аляксандра Лукашэнкі. Больш за 90% рэспандэнтаў ставіцца да Аляксандра Лукашэнкі адмоўна (76,3% — адмоўна, 15,9% — пераважна адмоўна). Пазітыўна да Аляксандра Лукашэнкі ставяцца 3,3% апытаных (0,5% — цалкам станоўча, а 2,8% — пераважна станоўча).
Дзве траціны апытаных цалкам (46,7%) ці хутчэй (22,5%) падтрымліваюць поўны разрыў усіх адносін Украіны з Беларуссю пасля перамогі Украіны. Цалкам не падтрымліваюць поўнага разрыву ўсіх адносін Украіны з Беларуссю 5,4% апытаных, хутчэй не падтрымліваюць — 11,2%.
Раней Аляксандр Лукашэнка, паводле вынікаў апытання таго ж цэнтра Разумкова, быў самым папулярным замежным палітыкам ва Украіне. Напрыклад, у лютым 2020 года давер да яго выказалі 48% украінцаў, аднак не давяралі яму толькі 36%. Пасля выбараў 2020 года і жорсткага здушэння пратэстаў у Беларусі стаўленне да яго ў жыхароў Украіны пачало мяняцца — доля тых, хто давярае Лукашэнку ва Украіне, знізілася да 30,5%, а тых, хто не давярае, вырасла да 57%.
Канчаткова яго рэйтынг ва ўкраінцаў абрынуўся пасля пачатку вайны ва Украіне. Нагадаем, пасля абвяшчэння пра пачатак «спецыяльнай ваеннай аперацыі» Уладзімірам Пуціным 24 лютага расійскія войскі зайшлі ва Украіну ў тым ліку з тэрыторыі Беларусі, што зрабіла нашую краіну суўдзельніцай акту ваеннай агрэсіі, нягледзячы на ўсе абяцанні Лукашэнкі ўкраінскім лідарам, што «ніколі з нашай тэрыторыі не будуць атакаваць Украіну». Да таго ж з тэрыторыі Беларусі наносіліся ракетныя ўдары па ўкраінскіх пазіцыях — гэта прызнаваў і сам Лукашэнка. Ён таксама прызнаў, што Беларусь «лечыць і корміць» расійскіх вайскоўцаў.
Вынікі сацыялагічнага апытання, якое праводзілася сацыялагічнай службай цэнтра Разумкова з 22 лютага да 1 сакавіка 2023 года. Апытанне метадам face-to-face праводзілася ў Вінніцкай, Валынскай, Днепрапятроўскай, Жытомірскай, Закарпацкай, Запарожскай, Івана-Франкоўскай, Кіеўскай, Кіраваградскай, Львоўскай, Мікалаеўскай, Адэскай, Палтаўскай, Ровенскай, Сумскай, Цярнопальскай, Харкаўскай, Хмяльніцкай, Чаркаскай, Чарнігаўскай, Чарнавіцкай абласцях і Кіеве (у Запарожскай, Мікалаеўскай, Харкаўскай, Херсонскай абласцях — толькі на тых тэрыторыях, якія кантралююцца ўрадам Украіны і на якіх не вядуцца баявыя дзеянні). Апытаныя 2020 рэспандэнтаў ва ўзросце ад 18 гадоў. Тэарэтычная хібнасць выбаркі не перавышае 2,3%.