Экс-уладальнік «Мотавела» і шклозавода «Елізава», бізнесовец Аляксандр Мураўёў выйшаў на волю. Паводле звестак крыніц Office Life, бізнесовец быў вызвалены ў снежні-студзені — і практычна адразу пакінуў краіну. Як мяркуецца, цяпер Аляксандр Мураўёў жыве ў Дубаі (ААЭ).
На якой падставе Мураўёў выйшаў на волю, невядома. Раней паведамлялася, што яму змякчылі рэжым утрымання і перавялі ў калонію-паселішча.
Нагадаем, Аляксандр Мураўёў з 2007 года валодаў ААТ «Мотавела» праз сваю аўстрыйскую кампанію ATEC Holding GmbH, такім самым чынам меў долі Елізаўскага і Гомельскага шклозаводаў. Мураўёў уваходзіў у першыя некалькі дзясяткаў самых паспяховых бізнесоўцаў Беларусі. У 2013 годзе Аляксандр Лукашэнка пабываў на «Мотавела» і раскрытыкаваў яго за нездавальняючыя тэмпы працы, здачу плошчаў у арэнду, адсутнасць абяцаных уладальнікамі інвестыцый у 20 млн даляраў.
У 2015 годзе Мураўёў быў затрыманы падчас спробы вылецець у Аўстрыю. Як заяўляў тагачасны кіраўнік КДК, бізнесовец «разваліў» «Мотавела». Прэтэнзіі следства таксама датычылі шклозаводаў (елізаўскі аказаўся банкрутам). Сам Мураўёў абвінавачанні адмаўляў, у тым ліку пасля прысуду.
У 2017 годзе бізнесоўца прызналі вінаватым па чатырох артыкулах (махлярства ў асабліва буйным памеры, арганізацыя і дапамаганне ва ўхіленні ад выплаты падаткаў шляхам заніжэння падатковай базы, арганізацыя завалодвання маёмасцю з выкарыстаннем службовых паўнамоцтваў, крадзеж шляхам злоўжывання службовымі паўнамоцтвамі паўторна групай асоб у асабліва буйным памеры). Яго асудзілі на 11 гадоў пазбаўлення волі ў калоніі ўзмоцненага рэжыму з канфіскацыяй маёмасці.
Усе акцыі «Мотавела» пасля гэтага адышлі дзяржаве. Кіраваць прадпрыемствам паставілі экс-кіраўніка Мінскага гарвыканкама Мікалая Ладуцьку. У 2022 годзе ўжо ён быў звольнены са скандалам і адпраўлены працаваць намеснікам дырэктара камунальнага прадпрыемства. А праца «Мотавела» так і застаецца нездавальняючай — лакалізацыя вытворчасці аказалася праваленай, і ў апошнія месяцы кантраляваць працэс даводзіцца асабіста кіраўніку Савета Рэспублікі Наталлі Качанавай.