У МАРГ заявілі, што ўдалося вырашыць праблему, як у міжсезонны перыяд забяспечыць наяўнасць у продажы айчыннай гародніны і яблыкаў. Пра гэта заявіў кіраўнік ведамства Аляксей Багданаў, перадае БЕЛТА. Гэтая праблема раней збянтэжыла ў тым ліку Аляксандра Лукашэнку, прэм’ера Рамана Галоўчанку, Дзяржкантроль, прафсаюзы.
«Перад намі стаяла задача, каб на паліцах крамаў увесь міжсезонны перыяд была айчынная прадукцыя — тавары „боршчавага набору“ (бульба, капуста, морква, буракі, цыбуля) і яблыкі, прычым у шырокім асартыменце і высокай якасці. Мы з году ў год вырабляем больш, чым спажываем, але сістэма загрузкі стабілізацыйных фондаў пад поўнае запатрабванне былавыкарыстаная сёлета ўпершыню. Лічым, што гэтая праца ўдалася, — сказаў Аляксей Багданаў. — Сёння гэтая праблема вырашаная, прычым досыць радыкальна. Мы спецыяльна ўвялі новы тып дамоваў, дзе прапісалі адказнасць для гандлёвых арганізацый па выбарцы прадукцыі, а для вытворцаў — абавязанне паставіць яе добрай якасці і па выгаднай цане».
Якая канкрэтна адказнасць прадугледжаная за парушэнні такіх дамоваў, чыноўнік не ўдакладніў. Раней МАРГ абмяжоўваўся патрабаваннямі распрадаць беларускую гародніну.
Пры гэтым кіраўнік МАРГ заявіў, што раней паміж «беларускімі вытворцамі і гандлёвымі сеткамі было пэўнае неразуменне», але спрэчныя пытанні ўдалося вырашыць.
«Былі ўлічаныя ўсе нюансы. У вытворцаў была магчымасць прадаваць нявыбраную прадукцыю на экспарт, а ў гандлю — набываць тавар у тых, чые якасць і цана задавальняюць. Праца выкананая эфектыўна, прадукцыя са стабфондаў выбраная пад 100%. МАРГ сёлета не атрымліваў скаргаў ад спажыўцоў на адсутнасць беларускіх яблыкаў і гародніны на паліцах. У крамах і надалей будзе знаходзіцца айчынная прадукцыя ў міжсезонны перыяд пад поўнае запатрабаванне», — перакананы Аляксей Багданаў.
Аднак кіраўнік МАРГ, відавочна, не ўлічыў прадукцыі, якая не даехала да прылаўкаў крамаў, а прапала ў стабфондах.
У папярэднія гады ў Беларусі ўзнікалі пытанні па наяўнасці ў продажы айчынных гародніны і яблыкаў, таксама былі пытанні па цэнах, бо часцяком імпартныя аналагі маглі быць таннейшыя. Адной з прычын, з якой гэта адбывалася, чыноўнікі і прафсаюзы называлі тое, што гандаль не выбірае гародніну і яблыкі са стабілізацыйных фондаў. Пры гэтым рытэйл тлумачыў, што іх часта не задавальняе якасць тавару.