Прэзідэнт Расіі Уладзімір Пуцін 12 кастрычніка прыбыў з афіцыйным візітам у Кыргызстан. Аляксандр Лукашэнка раней сцвярджаў, што ў Бішкеку расійскі лідар надасць час і яму, але такой двухбаковай сустрэчы не чакаецца, пішуць «Ведомости».
Прэзідэнт РФ прабудзе ў Кыргызстане да 13 кастрычніка. 12 кастрычніка ў Бішкеку адбудуцца двухбаковыя перамовы Пуціна з кыргызстанскім лідарам Садырам Жапаравым, а таксама з кіраўніком Азербайджана Ільхамам Аліевым.
На наступны дзень Пуцін возьме ўдзел у паседжанні Савета кіраўнікоў дзяржаваў СНД, якое пройдзе ў вузкім і пашыраным складах. Лідары краін СНД падвядуць вынікі працы ў 2023 годзе, акрэсляць новыя напрамкі і абмяркуюць міжнародныя і рэгіянальныя тэмы. У гэты ж дзень Пуцін сустрэнецца з прэзідэнтам Таджыкістана Эмамалі Рахмонам.
У канцы верасня Аляксандр Лукашэнка сцвярджаў, што падчас саміту Пуцін надасць час і яму, але, як расказаў «Ведомостям» памочнік прэзідэнта Расіі Юрый Ушакоў, такой двухбаковай сустрэчы ў планах расійскага лідара няма.
Пры гэтым раней перамовы Пуціна і Лукашэнкі ў Бішкеку таксама анансавалі ў Крамлі.
«Можам пацвердзіць, сапраўды, такая паездка (у Кыргызстан. — Заўв. рэд.) у прэзідэнта (Расіі. — Заўв. рэд.) плануецца, і плануецца там сустрэча (з Лукашэнкам. — Заўв. рэд.)», — сказаў прэс-сакратар расійскага лідара Дзмітрый Пяскоў.
Няма інфармацыі пра сустрэчу Лукашэнкі і Пуціна і ў паведамленні прэс-службы беларускага палітыка. У публікацыі толькі ўдакладняецца, што Лукашэнка 12 кастрычніка паедзе з рабочым візітам у Кыргызстан для ўдзелу ў паседжанні Савета кіраўнікоў дзяржаваў СНД.
«На палях саміту, падчас сустрэч, перамоваў і ўзаемадзеяння кіраўнікоў дзяржаваў, будуць абмяркоўвацца і пытанні двухбаковага супрацоўніцтва паміж краінамі», — удакладніла прэс-служба.