Міністр унутраных справаў Іван Кубракоў заявіў, што асуджаныя па артыкулах за «экстрэмізм» і «тэрарызм» не трапяць пад амністыю, прымеркаваную да 80-годдзя вызвалення Беларусі ад нямецка-фашысцкіх захопнікаў, піша БЕЛТА.
Паводле яго словаў, асобы, асуджаныя па артыкулах за «экстрэмізм» і «тэрарызм», як мяркуецца на гэты момант, не трапяць пад амністыю.
«Намі было прапанавана: экстрэмісты і тэрарысты, якія асуджаныя і прыцягнутыя да крымінальнай адказнасці, — да іх амністыю не ўжываць. Нашую прапанову падтрымалі. Таму што ўсе разумеюць, што ўчынілі гэтыя людзі. І на сённяшні дзень праблема застаецца. На жаль, тыя збеглыя, якія сёння знаходзяцца за мяжой, спрабуюць уплываць розным спосабам на нашых грамадзян, асабліва на моладзь, якая знаходзіцца тут. Але сітуацыю мы кантралюем, вядзём разведку ў тым ліку і ў інтэрнэце, бо ўсё гэта адбываецца дыстанцыйна», — расказаў кіраўнік МУС.
Ён дадаў, што ў кожнага, хто асуджаны за «экстрэмізм» і «тэрарызм», была магчымасць звярнуцца да Лукашэнкі з прашэннем пра памілаванне.
Каго прапануецца амніставаць
У аснову новага законапраекта МУС прапанавала пакласці структуру закона пра амністыю 2022 года.
Гаворка ідзе пра безумоўнае вызваленне ад усіх відаў пакарання, а таксама спыненне папярэдняга расследавання па крымінальных справах у дачыненні да асобаў, якія ўчынілі злачынствы, што не ўяўляюць вялікай грамадскай небяспекі або адносяцца да катэгорыі менш цяжкіх. У сувязі з гэтым на амністыю змогуць разлічваць няпоўнагадовыя, цяжарныя жанчыны, жанчыны і адзінокія мужчыны, якія маюць дзяцей ва ўзросце да 18 гадоў, асобы пенсійнага ўзросту, інваліды I і II груп, хворыя на актыўную форму туберкулёзу, хворыя на анкалагічныя захворванні і ВІЧ-інфікаваныя, ветэраны баявых дзеянняў на тэрыторыі іншых дзяржаваў, грамадзяне, якія пацярпелі ад катастрофы на ЧАЭС, асобы льготнай катэгорыі грамадзян.
Паводле міністра, прапануецца вызваліць асобаў (якія ўчынілі злачынствы, што не ўяўляюць вялікай грамадскай небяспекі), якім прызначылі пакаранне ў выглядзе абмежавання волі ці пазбаўлення волі. Таксама прапануецца вызваліць людзей (якія ўчынілі злачынствы, што адносяцца да катэгорыі менш цяжкіх), якім прызначылі пакаранне ў выглядзе абмежавання волі, пазбаўлення волі і якія адбылі на дзень уступлення ў сілу закона не менш за адну чвэрць прызначанага судом тэрміну пакарання.
Паведамляецца, што частка асуджаных зможа разлічваць на скарачэнне тэрмінаў адбыцця пакарання.
Яшчэ адна прапанова для ўключэння ў законапраект — вызваленне ад неадбытай часткі пакарання асобаў (якія не ўваходзяць у льготную катэгорыю грамадзян), што ўчынілі цяжкія злачынствы іў якіх на дзень разгляду матэрыялаў пра амністыю да заканчэння тэрміну пакарання застаецца менш за адзін год.
Акрамя таго, прапануецца скараціць тэрмін пакарання на адзін год людзям, якія ўчынілі ва ўзросце да 18 гадоў злачынствы, звязаныя з незаконным абаротам наркатычных сродкаў, псіхатропных рэчываў і іх прэкурсораў; якія ўчынілі карупцыйныя злачынствы.