Фінансавая платформа Currencycloud, якая належыць міжнароднай аплатнай сістэме Visa, абмежавала пераводы грошай у Беларусь. Пра гэта гаворыцца на сайце кампаніі. Увагу на публікацыю звярнуў Office Life.
Дагэтуль Currencycloud аказвала банкам і фінтэхкампаніям паслугі абмену валюты для транспамежных плацяжоў.
Аднак у сувязі з абноўленай «палітыкай барацьбы з адмываннем грошай і патрабаваннямі праверкі санкцый» кампанія адмовілася атрымліваць і пераводзіць сродкі з некаторых краін.
Яна тлумачыць, што «вельмі сур’ёзна ставіцца да сваіх абавязкаў» і ў адпаведнасці са сваёй палітыкай вымушаная адмовіцца ад пераводаў у Беларусь.
У спіс краін, для якіх таксама сталі немагчымыя аперацыі на платформе, уключаныя КНДР, Расія, Куба, Іран, Лівія, Судан, Паўднёвы Судан, Сірыя, Венесуэла і Казахстан. У ім таксама ёсць Крым, Данецкая, Херсонская, Луганская і Запарожская вобласці.