Першае паседжанне Усебеларускага народнага сходу, які атрымаў канстытуцыйны статус, мусіць прайсці 24−25 красавіка. Пра гэта заявіў прэм’ер-міністр Раман Галоўчанка пасля нарады ў Аляксандра Лукашэнкі.
Як заявіў Лукашэнка, «хоць гэта і сёмае скліканне», важна «і знешне, і па змесце правесці яго на самым высокім узроўні».
«Яшчэ раз паўтару, што гэта і ўрачыста мусіць быць і, самае галоўнае, змястоўна. Каб было як выбары ў Расіі, — камар носа не падаткне. Каб нас потым не папракалі. Усё цяпер сканцэнтравана палітычна на нас. У Расіі бурных падзей не мяркуецца, вакол таксама. Засталося ў нас правядзенне Усебеларускага народнага сходу. Стаўкі асобных нашых збеглых і Захаду на тое, каб пастарацца як мага больш прынесці дэзарганізацыі і развалу падчас паседжання і прыняцця рашэння, — мы такога падарунка ім паднесці не мусім», — сказаў ён.
Паводле Рамана Галоўчанкі, у першы дзень дэлегаты плануюць разглядаць арганізацыйна-выбарчыя пытанні, у прыватнасці, абраць рабочыя органы, падліковую камісію, старшыню, намесніка старшыні і Прэзідыум УНС, а таксама прыняць часовы рэгламент працы сходу. Менавіта гэты арганізацыйны працэс будзе адрозніваць наступны УНС ад тых, што былі раней, і тых, што будуць праводзіцца ў будучыні.
Другі дзень, паводле Галоўчанкі, будзе прысвечаны разгляду канкрэтных пытанняў, вынесеных на парадак дня.
Нагадаем, у лютым 2022 года беларускія ўлады правялі рэферэндум, пасля якога змянілася Канстытуцыя Беларусі.
У Беларусі з’явіцца новы орган улады — Усебеларускі народны сход. У яго склад увойдзе 1200 чалавек. Сярод іх — дзейны на той момант і былы прэзідэнты, прадстаўнікі заканадаўчай, выканаўчай і судовай улады, грамадзянскай супольнасці, мясцовыя дэпутаты.
З 12 да 31 сакавіка ў Беларусі праходзіць вылучэнне кандыдатаў у дэлегаты УНС ад суб’ектаў грамадзянскай супольнасці. Самі выбары дэлегатаў УНС плануюць правесці з 1 да 10 красавіка.
На найбліжэйшым УНС збіраюцца зацвердзіць Канцэпцыю нацыянальнай бяспекі і Ваенную дактрыну.