Неабходна знайсці рашэнні, якія абмяжоўваюць паток грамадзян Расіі і Беларусі, што прыбываюць у Літву. Але гэта неабходна зрабіць, выразна аддзяліўшы прадстаўнікоў беларускай апазіцыі, заявіў дарадца прэзідэнта Літвы Кястуціс Будрыс, піша DELFI.
«Прэзідэнт кажа, што дзейнасць, якую вядуць супраць нас беларускія службы, дазваляюць нам аднолькава ацэньваць усіх грамадзян замежных краін — Расіі і Беларусі — якія перасякаюць мяжу. [Патокі неабходна] істотна абмежаваць і скараціць, бо цяпер яны занадта вялікія. І тое, што кажуць нашыя разведка і контрразведка, — трэба да гэтага паставіцца сур’ёзна», — заявіў Будрыс.
Пры гэтым ён адзначыў, што падчас прыняцця рашэнняў наконт абмежавання патокаў з Расіі і Беларусі неабходна аддзяліць прадстаўнікоў беларускай апазіцыі.
«Не чапаць пытанняў, якіх ніхто не ставіць пад сумнеў, — беларускую апазіцыю, людзей, якія ўжо знаходзяцца тут, у якіх ужо ёсць часовы від на жыхарства ў Літве, якія ствараюць сем'і. І перастаць запалохваць іх цяжкімі наступствамі з мэтай палітычнай маніпуляцыі», — падкрэсліў ён.
Нагадаем, на мінулым тыдні Сейм Літвы прыняў рашэнне ўхваліць папраўкі да закона, скіраваныя на падаўжэнне нацыянальных санкцый супраць грамадзян Расіі і Беларусі яшчэ на год і ўзмацнення надгляду беларусаў, якія прыбываюць у краіну.