У Віцебску за абразу Аляксандра Лукашэнкі судзілі 20-гадовага жыхара горада. Падрабязнасці крымінальнай справы паведамілі ў пракуратуры.
Як сцвярджаюць у наглядным ведамстве, «у адзін з дзён чэрвеня» мужчына спрабаваў пакласці грошы на свой рахунак праз інфакіёск. Правесці аперацыю яму не ўдалося.
«Раззлаваўшыся, ён, прыйшоўшы дадому, выкарыстоўваючы свой мабільны тэлефон, патэлефанаваў супрацоўніку кантакт-цэнтра ААТ „ААБ Беларусбанк“ і падчас праведзенай гутаркі негатыўна выказаўся на адрас прэзідэнта Рэспублікі Беларусь», — паведамілі ў пракуратуры, дадаўшы, што словы абвінавачанага былі «зневажальнымі», «падрывалі аўтарытэт» Лукашэнкі, яго «асабістыя і прафесійныя якасці».
Дэталі гутаркі супрацоўніца «Беларусбанка» перадала кіраўніцтву. Тыя — сілавікам. У выніку на мужчыну завялі крымінальную справу па ч. 1 арт. 368 КК (Абраза Лукашэнкі).
У судзе жыхар Віцебска віну прызнаў. Свае дзеянні патлумачыў «моцным эмацыйным станам».
Суд прызнаў яго вінаватым і адправіў у калонію агульнага рэжыму на год і тры месяцы. У яго таксама канфіскавалі тэлефон «як сродак здзяйснення злачынства».