Большасць жыхароў Мінска былі б не гатовыя да павышэння пенсійнага ўзросту, але многія хацелі б працягваць працаваць пасля выхаду на такі адпачынак. Гэта паказала апытанне Цэнтра аператыўных даследаванняў Інстытута сацыялогіі НАН, паведаміў яго кіраўнік Аляксандр Бельскі, піша дзяржагенцтва «Мінск-Навіны».
Апытанне праводзілі праз тэлефон. Усяго ў ім узяло ўдзел 900 чалавек, старэйшых за 18 гадоў, з Мінска, абласных гарадоў, некаторых райцэнтраў і вясковай мясцовасці. Агучаныя былі толькі вынікі па Мінску.
Сярод мінчукоў працягваць працаваць пасля дасягнення пенсійнага ўзросту гатовы 81% апытаных. У цэлым па краіне так адказалі 61,6%.
— Толькі 6,5% рэспандэнтаў з нашага горада (Мінска. — Заўв. рэд.) па дасягненні пенсійнага ўзросту збіраюцца сысці на адпачынак. Не змаглі вызначыцца з адказам 12,5% удзельнікаў апытання, — паведаміў кандыдат сацыялагічных навук, дацэнт Аляксандр Бельскі.
Прадстаўнік НАН Беларусі таксама расказаў пра іншыя дадзеныя (пры гэтым ён не ўдакладніў, як менавіта гучалі пытанні). Як паведаміў Аляксандр Бельскі, 39,3% мінчукоў рознага ўзросту хацелі б працаваць толькі да 40−55 гадоў. 29,2% апытаных паведамілі, што аддалі б перавагу таму, каб атрымліваць пенсію з 56−65 гадоў.
І толькі 31,5% выбралі выхад на заслужаны адпачынак пасля 66 гадоў.
У Беларусі апошні раз павышалі пенсійны ўзрост з 1 студзеня 2022 года: для мужчын — да 63 гадоў, а для жанчын — да 58. У 2025-м ён будзе на такім самым узроўні.
У нашай краіне таксама перыядычна падымаецца пытанне раўнавання пенсійнага ўзросту. Беларускі жывуць даўжэй, чым беларусы (паводле звестак за 2019 год, у мужчын гэта каля 64 гадоў, а ў жанчын — 78 гадоў). Яшчэ адна прычына — агульная дэмаграфічная сітуацыя: колькасць пенсіянераў расце, а працаздольнага насельніцтва — наадварот, скарачаецца.
У Мінпрацы восенню мінулага года заяўлялі, што гэтае пытанне «не прапрацоўваецца і не разглядаецца».
Апытанне таксама паказала, што беларусы аддаюць перавагу таму, каб мяняць працу ў сярэднім раз на тры-пяць гадоў. Большасць патлумачыла гэта пошукам лепшых умоваў працы.
Амаль траціна (33%) апытаных мінчукоў хацела б змяніць працу. Для іх важныя такія ўмовы, як добрая зарплата, сацыяльныя гарантыі, бытавыя ўмовы, станоўчы мікраклімат.
Чытайце таксама
