Інаўгурацыя Аляксандра Лукашэнкі пройдзе 25 сакавіка. Пра гэта паведамляе ягоная прэс-служба. У гэты дзень беларусы адзначаюць Дзень Волі.
Выбары-2025, як і любая электаральная кампанія пасля прыходу ў 1994 годзе да ўлады Аляксандра Лукашэнкі, ні сумленныя, ні свабодныя. Падрабязней пра тое, як рэжым дзесяцігоддзямі крадзе галасы беларусаў і беларусак, мы расказалі ў праекце «Без выбару».
Раней Эйсмант заяўляла, што «мы плануем, прадумваем, з якіх складовых частак яна будзе складацца».
— Нічога рэвалюцыйна новага, вядома ж, не будзе. Усе асноўныя элементы будуць захаваныя. Але шукаем, чым бы трошкі разнастаіць, упрыгожыць гэтую найважнейшую цырымонію, — расказала прэс-сакратарка.
У ЦВК таксама паведамлялі, што інаўгурацыя мае прайсці цягам двух месяцаў пасля выбараў.
«Закон адводзіць два месяцы, але (прызначаць дату афіцыйнага ўступлення прэзідэнта на пасаду) гэта не задача ЦВК, (яе) будзе вызначаць абраны кіраўнік дзяржавы», — пракаментаваў кіраўнік ЦВК Ігар Карпенка.