Малалетняе дзіця грамадзянкі Беларусі і яе мужа знайшлі загінулымі ў Турцыі. Пра гэта БЕЛТА паведамілі ў пасольстве Беларусі ў Турцыі.
«Паводле ўдакладненай інфармацыі з месца пошукавых работ у Кахраманмарашы, з-пад завалаў дасталі целы яе мужа (грамадзяніна Турцыі) і аднаго малалетняга дзіцяці. Абое загінулі. Пошукі грамадзянкі Беларусі і яе другога малалетняга дзіцяці працягваюцца», — праінфармавалі ў дыпмісіі.
Напярэдадні тэлеканал «Белсат» са спасылкай на знаёмую загінулай жанчыны паведаміў, што загінула ўся сям’я.
8 лютага ў беларускім пасольстве ў Анкары расказалі, што пасля стыхійнага бедства не могуць знайсці чатырох беларусаў — адну жанчыну і траіх дзяцей. Сярод іх — грамадзянка Беларусі і двое яе дзяцей, якія жылі якраз у горадзе Кахраманмараш.
Землятрус магнітудай 7,7 з эпіцэнтрам на глыбіні 7 км здарыўся ў 4.17 раніцы 6 лютага ў правінцыі Кахраманмараш на поўдні Турцыі. Наступствы закранулі мноства рэгіёнаў Турцыі і суседняй Сірыі. Штуршкі доўжыліся ўвесь дзень. Паводле апошніх звестак, загінула больш за 11 тысяч чалавек.