Следчы камітэт высветліў асобы ўсіх загінулых у аварыі маршруткі і грузавіка ў Смалявіцкім раёне. Кіроўцу МАЗа затрымалі, паведамляе прэс-служба ведамства.
У ведамстве адзначылі, што колькасць загінулых не змянілася — 11 чалавек, сярод іх двое няпоўнагадовых (13 і 14 гадоў). У бальніцы застаюцца 9 чалавек з траўмамі рознай ступені цяжкасці.
«Падчас вывучэння асобаў пацярпелых выяўлена, што кіроўца маршруткі жывы і знаходзіцца ў бальніцы. Першапачатковая інфармацыя пра яго гібель не пацвердзілася», — паведамілі ў СК.
Там таксама заявілі, што кіроўца МАЗа затрыманы па падазрэнні ў здзяйсненні злачынства.
Акрамя таго прызначаныя пазапланавыя праверкі транспартных кампаній па пытаннях арганізацыі перавозак.
Нагадаем, 20 лютага ў Смалявіцкім раёне сутыкнуліся гружаны пяском МАЗ і маршрутнае таксі. У ДТЗ загінулі 11 чалавек. Кіраўнік МУС Іван Кубракоў заявіў, што, паводле папярэдніх звестак, хуткасны рэжым кіроўцы не парушалі.
