Кошт навучання ў беларускіх ВНУ будзе павышацца пачынаючы са снежня гэтага года, заявіў міністр адукацыі Андрэй Іванец. Пра гэта ён расказаў выданню «СБ. Беларусь сегодня».
«Так, плануем рост ад 3 да 17% у залежнасці ад спецыяльнасці», — сказаў ён, адказваючы на пытанне пра тое, ці вырасце кошт навучання ўжо са снежня.
Пры гэтым кіраўнік ведамства адзначыў, што кожная ВНУ будзе прымаць рашэнне наконт павышэння прайсу самастойна.
Іванец таксама паабяцаў, што «сённяшнія студэнты-платнікі не будуць адпрацоўваць размеркаванне».
«Змены ў заканадаўчую базу закрануць тых, хто будзе паступаць у нашыя ўніверсітэты альбо каледжы пасля ўступлення ў сілу новых нормаў. Сённяшнія студэнты-платнікі не будуць адпрацоўваць размеркаванне», — сказаў міністр.
Нагадаем, 25 лістапада Андрэй Іванец анансаваў павышэнне кошту навучання ў ВНУ: «Выдаткі за год штогод растуць прыкладна на 16−17 працэнтаў, таму мы мяркуем, што за межы гэтай сумы, безумоўна, павелічэнне кошту не выйдзе».
У жніўні 2023-га Андрэй Іванец заявіў, што ў Беларусі няма платнай адукацыі, а тое, што такою лічыцца, — гэта форма сацпадтрымкі моладзі і датуецца дзяржавай. Тады ж Аляксандр Лукашэнка загаварыў пра размеркаванне і для платнікаў. На яго думку, беларуская вышэйшая адукацыя каштуе даражэй, чым плацяць студэнты.