Самалёт Уладзіміра Пуціна па дарозе ў Мінск суправаджаў борт-двайнік. Як заўважыў праект Motolko.help, лайнер-дублёр прызямліўся ў Нацыянальным аэрапорце Мінск на 12 хвілін раней за самалёт, якім прыляцеў Пуцін.
Паводле звестак Motolko.help, борт Уладзіміра Пуціна Іл-96−300ПУ (рэйс RA-96021) здзейсніў пасадку ў Нацыянальным аэрапорце Мінск 23 траўня ў 23.10. Да гэтага, у 22.58, прызямліўся яго борт-двайнік. Абодва самалёты суправаджалі чатыры знішчальнікі. Motolko.help сцвярджае, што два з іх — самалёты Ваенна-паветраных сіл Беларусі і два — Ваенна-касмічных сіл Расіі.
Апошні раз Пуцін прылятаў у Беларусь 23 лістапада 2023 года. Праект Motolko.help паведамляў, што паўгода таму самалёт расійскага прэзідэнта таксама суправаджалі знішчальнікі, але інфармацыі пра борт-двайнік тады не было.
Нагадаем, інфармацыя пра візіт Пуціна ў Мінск з’явілася раніцай 23 траўня 2024 года. Яго перамовы з Аляксандрам Лукашэнкам пройдуць сёння, 24 траўня, у Палацы Незалежнасці спачатку ў вузкім, а потым у пашыраным складзе.
Чытайце таксама
