Узоры «пашпарта новай Беларусі» пакуль не гатовыя, паведаміў кіраўнік Народнага антыкрызіснага ўпраўлення, намеснік кіраўніка Аб’яднанага пераходнага кабінета Павел Латушка 6 чэрвеня на сустрэчы з беларускай дыяспарай у Любліне, паведамляе «Позірк».
«Займаецца гэтым [прадстаўнік па міжнародных справах] Валерый Георгіевіч Кавалеўскі ў [Аб'яднаным пераходным] кабінеце, — сказаў ён. — Аўтаномна даволі, так, імкнецца нас не дапускаць да гэтай тэмы».
Праект прайшоў «усе з пункту гледжання ўзгаднення працэдуры» ў Еўракамісіі, ён па бяспецы адпавядае стандартам замежных пашпартоў, дадаў Латушка.
«Я прысутнічаў на гэтым пасяджэнні кантактнай групы „Беларусь — ЕС“ у Брусэлі, дзе намеснік дырэктара дэпартамента па пытаннях міграцыі пацвердзіў гэта. І пры гэтым сказаў, што Еўрапейская камісія не можа прыняць рашэнне аб прызнанні гэтага дакумента, бо гэта не з’яўляецца кампетэнцыяй ЕС. Гэта з’яўляецца выключнай кампетэнцыяй нацыянальных урадаў», — дадаў палітык.
Папярэднюю згоду на прызнанне дакументаў выказалі дзве краіны «і нават былі гатовыя прадаставіць краінавы код», сцвярджае ён.
«Пакуль гэта, шчыра, падвісае. Падвісае з пункту гледжання [таго, што] няма ўзору — раз, падвісае з пункту гледжання прызнання», — падкрэсліў экс-дыпламат.
Паводле Латушкі, ён абмяркоўваў пытанне прызнання дакумента з адным з намеснікаў міністра ўнутраных спраў Польшчы: «Ён сказаў мне: „Маё прыватнае меркаванне — я не лічу гэта рэальным“.
Змяніць такое стаўленне могуць факты прызнання яго іншымі краінамі, лічыць Латушка.
Аб праекце „пашпарта Новай Беларусі“ стала вядома ў лютым 2023 года.
4 верасня Аляксандр Лукашэнка падпісаў указ № 278 „Аб парадку выдачы дакументаў і здзяйснення дзеянняў“, які пазбавіў замежныя ўстановы Беларусі магчымасці падаўжаць тэрмін дзеяння пашпарта беларускага грамадзяніна і выдаваць новыя дакументы.
У сакавіку 2024 года АПК паведаміў аб завяршэнні стварэння „пашпартнага цэнтра“ і фарміравання „каманды прафесіяналаў“, якая будзе займацца праектам.
Тады ж было заяўлена аб затрымцы прыбыцця „спецыяльных матэрыялаў“ для вырабу першых 500 узораў гэтага дакумента.
Дэпартамент дзяржаўнай бяспекі (ДДБ) Літвы ацэньвае інфармацыю, якая з’явілася ў СМІ, аб сувязях з Мінскам літоўскай фірмы па вырабе пашпартоў „Гарсу Пасаўліс“, паведаміў 3 чэрвеня сайт Verslo žinios („Дзелавыя навіны“) са спасылкай на інфармацыю ДДБ.
28 траўня Беларускі расследацыйны цэнтр апублікаваў даследаванне „Пашпарт новай Беларусі“ і стары „кашалёк“ Лукашэнкі. Як кампанія-распрацоўшчык дакумента звязана з Віктарам Шаўцовым». Журналісты БРЦ сцвярджаюць, што літоўскае прадпрыемства звязанае з блізкім да Лукашэнкі бізнэсменам, а геральдычную раду Аб’яднанага пераходнага кабінета ўзначальвае былы супрацоўнік беларускага МУС.
29 траўня Кавалеўскі заявіў, што «кожны падрадчык і партнёр праекта „пашпарта новай Беларусі“ пройдзе праверку».