Ліквідатар польскай тэлекампаніі TVP Даніэль Горгаш падаў у пракуратуру заяву пра магчымасць здзяйснення злачынства. З яе вынікае, што праз фінансавыя парушэнні на тэлеканале «Белсат» кампанія магла зазнаць вялікія страты, паведамляе Radio Zet.
У пазове гаворка ідзе пра магчымыя фінансавыя парушэнні, невыкананне абавязкаў і злоўжыванне паўнамоцтвамі з боку папярэдняга кіраўніцтва «Белсата», у тым ліку былой дырэктаркі Агнешкі Рамашэўскай-Гузы.
Як паведамляе выданне са спасылкай на журналістаў-расследавальнікаў, праведзеная на «Белсаце» аўдытарская праверка нібыта выявіла фіктыўныя ці пераплачаныя рахункі за ІТ-паслугі. Паводле аўдытараў, у выніку кантрактаў, заключаных з іншымі структурамі, TVP магла зазнаць страты амаль на 7 мільёнаў злотых (каля 1,8 млн даляраў).
Таксама аўдытары нібыта выявілі, што кіраўніцтва «Белсата» заключала кантракты на аказанне ІТ-паслуг у абыход тэндарных працэдур і без аналізу рынку. Паводле іх, кантракты атрымалі кампаніі, якія не мелі адпаведнага досведу і былі створаныя спецыяльна пад канкрэтныя заказы.
Акрамя таго, праверка нібыта выявіла факт дублявання паслуг: напрыклад, іншай кампаніі плацілі за архіваванне матэрыялаў, размешчаных на YouTube, у той час як архіваванне звычайна выконвалася на цвёрдых дысках TVP.
Справаздача ліквідатара TVP Даніэля Горгаша адпраўленая ў акруговую пракуратуру ў Варшаве.
Экс-дырэктарка «Белсата» Агнешка Рамашэўская-Гузы ў сябе ў Х параўнала дзеянні кіраўніцтва тэлекампаніі з метадамі спецслужбаў у сацыялістычнай Польшчы.
«Каб было лягчэй утаймаваць і запалохаць супрацоўнікаў „Белсата“ і адпомсціць за маю пазіцыю, з мяне вырашылі зрабіць зладзейку. У выніку ў іх гэта напэўна не атрымаецца, але запэцкаць г****м паспрабуюць», — напісала яна.
Нагадаем, у пачатку сакавіка Агнешку Рамашэўскую-Гузы звольнілі пасля 17 гадоў працы на пасадзе дырэктаркі беларускамоўнага тэлеканала «Белсат», які ўваходзіць у структуру польскай тэлекампаніі TVP. Раней таксама стала вядома, што бюджэт тэлеканала будзе істотна скарочаны.
