Палітзняволеная Марыя Калеснікава «сёння фактычна галадае ў калоніі» і важыць 45 кг пры росце 175 см. Пра гэта паведміла ў Facebook яе сястра Таццяна Хоміч.
Марыя Калеснікава адбывае пакаранне ў Гомельскай папраўчай калоніі № 4. У лістападзе 2022 года яе шпіталізавалі з перытанітам з прычыны прабадной язвы і зрабілі аперацыю. Сястра палітзняволенай Таццяна Хоміч апошні ліст ад сваячкі атрымала 15 лютага мінулага года. Больш за 560 дзён інфармацыю пра стан Марыі яна вымушаная збіраць па крупінках «ад жанчын, якія сядзяць і выходзяць з калоніі».
«Паводле маёй інфармацыі, сёння Марыя фактычна галадае ў калоніі. Яна важыць 45 кг пры росце 175 см. Яе хвароба патрабуе дыеты, таму яна не можа есці многае з турэмнага меню. Яе ліміт на закупкі ў турэмнай краме — 40 ці 80 рублёў. Я не магу ўдакладніць суму, але разумею, што гэтага хопіць максімум на гарбату, аўсянку, пачак пракладак, мыла, мінімальную гігіену. Карміць язвеніка баландай — гэта катаваць яго і павольна забіваць. Не даваць чалавеку права на перапіску з сям’ёй — паскараць гэтую смерць. Маша не ведае, ці жывы тата і як яго здароўе. Мы не ведаем, як яе кормяць і лечаць», — напісала Таццяна.
Яна адзначыла, што блізкія Марыі звярталіся з гэтай нагоды «ў адміністрацыю калоніі і ў вышэйшыя інстанцыі», але «фактычна адказу няма».
«Сёння гэты кашмар можна спыніць. Сёння ў Беларусі зноў загаварылі пра гуманізм. І гэта дае мне надзею. З калоніі выйшлі дзясяткі чалавек. І гэта дае яшчэ большую надзею. Надзею, што ніякае пакаранне не будзе суправаджацца здзекамі і катаваннямі. Што Маша будзе жыць. Я прашу: забяспечыць ёй неабходнае харчаванне, даць ёй неабходнае абследаванне і лячэнне, дапусціць да яе родных і аднавіць з намі перапіску», — напісала Таццяна.
Чытайце таксама
