Парадзелыя ненадоўга чэргі на выезд у ЕС вярнуліся з новай сілай: на мяжы з Польшчай раніцай 16 верасня прастойвае амаль 60 аўтобусаў і 300 легкавікоў, паказваюць звесткі маніторынгу Дзяржпамежкамітэта.
Станам на 10.00 панядзелка, 16 верасня, у пункце пропуску «Брэст» (з польскага боку — «Тэрэспаль») у чарзе стаяла 300 легкавікоў і 58 аўтобусаў.
Яшчэ на выходных колькасць пасажырскіх аўтобусаў у «Брэсце» вагалася ў раёне 30−40, а вось колькасць аўтамабіляў у «калейцы» дасягала 450.
У «Беняконях» выезду ў Літву чакаюць два аўтобусы. Больш чэргаў на памежных пераходах з гэтай краінай няма.
Акрамя таго, на мяжы ў пунктах пропуску стаяць сотні грузавікоў. Уезду ў Літву чакаюць 1140 фур (710 — у «Беняконях» і 430 — у «Каменным Логу»). Таксама ў «Грыгароўшчыне» 630 грузавікоў стаяць у чарзе на выезд з Беларусі, а яшчэ 850 — у «Казловічах».
Нагадаем, у канцы жніўня на мяжы з Польшчай сілавікі затрымалі больш за дзесяць чалавек, якія прадавалі месцы ў аўтамабільнай чарзе перад шлагбаўмам. Пасля гэтага «калейка» на выезд у суседнюю краіну на нейкі час зменшылася: у асобныя дні колькасць аўтобусаў у ёй не перавышала дзясятка.
