У Кіеве і Кіеўскай вобласці з самай раніцы была абвешчаная паветраная трывога. Тэрыторыя падвергнулася ўдарам іранскіх дронаў-камікадзэ «Shahed-136/131».
У Паветраных сілах Украіны паведамілі, што беспілотнікі ляцяць з усходняга ўзбярэжжа Азоўскага мора.
— У цяперашні час зенітнымі ракетнымі падраздзяленнямі і іншымі агнявымі сродкамі Паветраных сіл Узброеных сіл Украіны ўжо знішчаныя дзесяць «Шахедаў» праціўніка! — паведаміла камандаванне Паветраных сіл.
Мэр Кіева Віталь Клічко расказаў, што ў горадзе прагучала некалькі выбухаў.
— У выніку ранішняй атакі на Кіеў і вобласць у сталіцы пашкоджаныя 2 адмінбудынкі, у горадзе Вішнёвае — прыватны дом, — напісаў у сваім тэлеграм-канале намеснік кіраўніка Офіса прэзідэнта Кірыл Цімашэнка.
У выніку падзення абломка ад дрона ў Кіеве людзі не пацярпелі, паведамілі «Суспільному» ў дзяржслужбе па надзвычайных сітуацыях.
— Кіеў зазнаў дзве хвалі атакі варожых дронаў. Дзякуючы эфектыўнай працы падраздзяленняў СПА і РЭБ знішчана 13 варожых дронаў. Абломкі ад збітых БПЛА трапілі ў адзін адмінбудынак, і яшчэ 4 жылыя будынкі атрымалі нязначныя пашкоджанні (Шаўчэнкаўскі раён сталіцы). Людзі не пацярпелі, — расказаў падрабязнасці кіраўнік гарадской ваеннай адміністрацыі Сяргей Папко.
Каля васьмі раніцы па кіеўскім часе быў абвешчаны адбой паветранай трывогі. Яна доўжылася больш за дзве гадзіны.
Прэзідэнт краіны Уладзімір Зяленскі заявіў, што, паводле папярэдняй інфармацыі, 13 з 13 запушчаных дронаў збіла ўкраінская СПА.