Расійскі знішчальнік Су-27 14 сакавіка пашкодзіў над Чорным морам амерыканскі разведвальны беспілотнік MQ-9. У выніку БПЛА затануў у міжнародных водах. Тэлеканал CBS апублікаваў відэарэканструкцыю інцыдэнту.
Як вынікае з роліка, два знішчальнікі цягам паўгадзіны 19 разоў праляцелі побач з дронам, скідваючы паліва. Яно трапіла на вінт беспілотніка, у выніку чаго той выйшаў з ладу.
Раней у Еўрапейскім камандаванні Узброеных сіл ЗША паведамілі, што 14 сакавіка два расійскія Су-27 здзейснілі «небяспечны і непрафесійны перахоп БПЛА разведкі, назірання і рэкагнасцыроўкі MQ-9 ВПС ЗША, які знаходзіўся ў міжнароднай паветранай прасторы над Чорным морам».
Паводле звестак ведамства, адзін з расійскіх самалётаў Су-27 зачапіў турбавінтавы рухавік MQ-9, у выніку чаго вайскоўцы ЗША былі вымушаныя затапіць беспілотнік у міжнародных водах.