Расія гатовая да мірнага ўрэгулявання канфлікту ва Украіне, аднак для гэтага неабходнае выкананне некалькіх умоваў, сярод якіх — аднаўленне разбуранай інфраструктуры на грошы Захаду. Пра гэта ў інтэрв'ю RTVI расказаў намеснік міністра замежных справаў Міхаіл Галузін.
Расія адкрытая «да разумных прапановаў па мірным урэгуляванні», але Украіна «працягвае рабіць стаўку на ваеннае рашэнне канфлікту», сказаў Галузін. Паводле яго словаў, «усёабдымны, справядлівы і ўстойлівы мір» ва Украіне і ў Еўропе магчымы пры выкананні наступных умоваў:
- спыненне баявых дзеянняў украінскімі ўзброенымі фарміраваннямі і паставак краінамі Захаду зброі;
- вывад замежных наймітаў з тэрыторыі дзяржавы;
- забяспечанне нейтральнага і пазаблокавага статусу Украіны;
- адмова ад уступлення Украіны ў NATO і ЕС;
- пацверджанне бяз’ядзернага статусу Украіны;
- прызнанне Кіевам і міжнароднай супольнасцю «новых тэрытарыяльных рэалій».
Акрамя таго, як падкрэсліў Міхаіл Галузін, абавязковымі ўмовамі для спынення канфлікту таксама з’яўляюцца «дэмілітарызацыя і дэнацыфікацыя Украіны, абарона правоў рускамоўных грамадзян, рускай мовы і нацменшасцяў, свабоднае трансгранічнае перамяшчэнне з Расіяй, адмена Украінай і Захадам антырасійскіх санкцый і адкліканне пазоваў, спыненне судовых пераследаў у дачыненні да Расіі, яе фізічных і юрыдычных асоб».
«Важна аднавіць дамоўна-прававую базу Украіны з Расіяй і СНД, а таксама — на сродкі Захаду — цывільную інфраструктуру, разбураную УСУ пасля 2014 года», — дадаў Галузін.
Нагадаем, у лістападзе 2022 года прэзідэнт Украіны Уладзімір Зяленскі агучыў сваю формулу міру — дзесяць пунктаў, сярод якіх — вывад расійскіх войскаў з тэрыторыі Украіны, аднаўленне тэрытарыяльнай цэласнасці краіны, спыненне баявых дзеянняў і правядзенне трыбунала над Расіяй.