Следчы камітэт Расіі адмовіўся заводзіць крымінальную справу «па факце знаходжання трупа» Аляксея Навальнага ў калоніі «Харп». Пра гэта гаворыцца ў пастанове, якую апублікавалі 15 жніўня паплечнікі расійскага палітыка.
Як вынікае з дакумента, афіцыйная прычына смерці Навальнага — «камбінаванае захворванне».
«Смерць Навальнага А.А. мае арытмагенны характар, які выявіўся ў парушэнні рытму і праводнасці сэрца. Трыгерам да ўзнікнення парушэння рытму стала крытычнае павышэнне артэрыяльнага ціску (гіпертанічны крыз), якое суправаджалася вызваленнем гарманальных вазаканстрыктараў, павелічэннем аб’ёму цыркуляцыі крыві, што прывяло да перагрузкі ціскам і аб’ёмам камер сэрца», — гаворыцца ў апублікаванай пастанове.
Паплечнікі Навальнага з такім заключэннем не пагадзіліся.
«Паўгода пуцінскія следчыя не маглі сфармуляваць сваю версію таго, што ж здарылася. І нічога не прыдумалі. Рэальна нічога. Напісалі кучу хваробаў, якія ёсць у кожнага другога, але ад якіх ніхто імгненна не памірае. І напісалі, што проста раптам узнікла арытмія, і таму Навальны памёр. Гэта нават не тромб, пра які казалі спачатку. Следчыя цяпер проста прыкрываюць забойства. Але я ўпэўнены, што яно будзе расследаванае і будуць знойдзеныя ўсе выканаўцы забойства», — напісаў дырэктар Фонду барацьбы з карупцыяй Іван Жданаў.
Нагадаем, 16 лютага ФСВП Расіі паведаміў пра смерць палітвязня Аляксея Навальнага. У паведамленні гаварылася, што ён памёр у калоніі пасля прагулкі. Следчы камітэт РФ арганізаваў працэсуальную праверку па факце смерці апазіцыянера.
У суботу, 17 лютага, каманда палітыка пацвердзіла яго смерць.
Аляксей Навальны знаходзіўся ў ПК-3 у пасёлку Харп Ямала-Нянецкай аўтаномнай акругі Расіі, куды яго перавялі з ПК-6 ва Уладзімірскай вобласці.
Упершыню яго асудзілі на пазбаўленне волі ў лютым 2021 года. Яму прызначылі два гады і восем месяцаў калоніі агульнага рэжыму па справе «Іў Рашэ», прызнаўшы вінаватым у махлярстве. У сакавіку 2022 года яго прызналі вінаватым па іншай справе пра махлярства і абразу суддзі, прызначыўшы дзевяць гадоў калоніі строгага рэжыму.
У жніўні мінулага года яго прызналі вінаватым у стварэнні экстрэмісцкай супольнасці, закліках да экстрэмізму, стварэнні НКА, якая замахваецца на правы грамадзян, фінансаванні экстрэмізму, а таксама ва ўцягванні няпоўнагадовых у небяспечныя дзеянні і рэабілітацыі нацызму. Яму прызначылі 19 гадоў пазбаўлення волі.
Чытайце таксама
