У сераду ўвечары ў індыйскім штаце Заходняя Бенгалія дзясяткі тысяч жанчын прайшлі вуліцамі на знак пратэсту супраць згвалтавання і забойства доктаркі-стажоркі ў дзяржаўнай бальніцы ў Калькуце, што здарылася на мінулым тыдні, піша Руская служба Бі-бі-сі.
Марш Reclaim the Night («Вернем сабе ноч») стаў кульмінацыяй амаль тыднёвых пратэстаў, якія пачаліся пасля забойства 31-гадовай жанчыны ў мінулую пятніцу.
Пасля цяжкай 36-гадзіннай змены яна заснула ў пакоі для семінараў праз адсутнасць спецыяльна адведзенага месца для адпачынку. Наступнае раніцы калегі знайшлі яе напаўаголенае цела са шматлікімі пашкоджаннямі. Паліцыя заявіла, што яна была згвалтаваная і забітая, а пасля ў сувязі з гэтым злачынствам быў арыштаваны паліцэйскі-валанцёр.
У пачатку тыдня многія дзяржаўныя бальніцы ў гарадах Індыі прыпынілі працу ўсіх службаў, акрамя аддзяленняў неадкладнай дапамогі, а малодшыя дактары выйшлі на вуліцы ў знак пратэсту, патрабуючы справядлівасці для ахвяры.
Хоць пратэсты былі ў асноўным мірнымі, яны былі азмрочаныя сутыкненнямі паміж паліцыяй і невялікай групай невядомых мужчын, якія ўварваліся ў бальніцу RG Kar, дзе адбылося забойства доктаркі, і разграмілі аддзяленне неадкладнай дапамогі.
Паліцыя ўжыла слезацечны газ, каб разагнаць натоўп. Падчас сутыкнення былі пашкоджаныя некалькі паліцэйскіх машын.
Невялікія акцыі пратэсту прайшлі таксама ў многіх іншых індыйскіх гарадах — у прыватнасці, у Дэлі, Хайдарабадзе, Мумбаі і Пуне.
Прэм’ер-міністр Нарэндра Модзі заклікаў да строгага пакарання за злачынствы супраць жанчын.
— Як грамадства мы павінныя задумацца пра тое, якія зверствы здзяйсняюцца ў дачыненні да нашых маці, дачок і сясцёр. У краіне абурэнне з гэтай нагоды. Я адчуваю гэтае абурэнне, — сказаў у чацвер Модзі ў звароце да нацыі з нагоды чарговага Дня незалежнасці.
Злачынствы супраць жанчын мусяць быць хутка расследаваныя. Жахлівыя паводзіны супраць жанчын мусяць быць сурова і хутка пакараныя, — падкрэсліў ён.
Здарэнне ўваскрэсіла ў памяці падобны выпадак у Нью-Дэлі ў 2012 годзе, калі банда мужчын згвалтавала і цяжка параніла 23-гадовую студэнтку ў аўтобусе, што ў выніку прывяло да яе смерці.
— Гэты жудасны інцыдэнт яшчэ раз нагадаў нам, што жанчыны нясуць непрапарцыйна вялікую нагрузку што да ўласнай бяспекі, — напісала балівудская акторка Алія Бхат на сваёй старонцы ў Instagram, дзе ў яе больш за 85 мільёнаў падпісчыкаў.
Дактары ў перапоўненых дзяржаўных бальніцах Індыі даўно скардзяцца на тое, што іх перагружаюць працай і недаплачваюць, і сцвярджаюць, што для барацьбы з гвалтам з боку пацыентаў, незадаволеных прапанаванай медыцынскай дапамогай, робіцца недастаткова.
Паводле звестак Нацыянальнага бюро рэгістрацыі злачынстваў (NCRB), апублікаваных у канцы мінулага года, у 2022 годзе колькасць злачынстваў супраць жанчын у Індыі вырасла на 4% у параўнанні з папярэднім годам.